اشتغلت مع عمى

من شوية لقيت أختي الصغيرة جاية بتبكي بحُرقة شديدة وعمالة تتكلم بسرعة ومش عارف أفهم منها كلمة واحدة، مسكتها بهدوء عشان أشوفها بتبكي ليه لقتها بتقول إن بنت عمها بتعايرها لأنها لابسة لبس قديم ومتوسخ وهي لابسة لبس جديد.. الكلام أثر في نفسيتي بطريقة مُبالغ فيها، وروحت لأبويا وأنا الد م بيغلي في عروقي وبدأت أزعق فيه وأقول: ـ شوفت المثالية بتاعتك ودتنا لفين، بنت أخوك بقت بتعاير بنتك على هدومها، وشوية وابنه الكبير هيتجوز وأنا قاعد مش لاقي عِشة أتجوز فيها حتى، أنا خلاص زهقت وقرفت. . قولت الكلمتين وخرجت وأنا عنيا بتطلع شرار من أبويا وأفعاله، وعشان كلامي يبقا واضح شوية فأبويا وعمي ماسكين المقابر لبلدنا والبلد اللي جنبنا، وتقريبًا كل قرايبنا متخصصين في الدفن وتنضيف المقابر والأشغال اللي زي دي، أبويا رضي بالقليل زي ما بيقول . بياخد مرتب عبارة عن يومية مع الحسنة اللي بياخدها من أهل الميت لما بينضف حوش أو يفرش تربة أو يجمع العضم القديم ويجهز المقابر للدفن، وفضلنا سنين مُعدمين حرفيًا، عكس عمي اللي في خلال كام سنة بس اشترى حتة الأرض اللي جنبنا وطلع ببيت كبير عشان يجوز ابنه فيه. . شوفنا عليهم البذخ والحياة المُرفهة يوم بعد يوم، لدرجة إنهم بقوا عايشين أحسن من أحسن ناس في البلد، حتى علاقاته كانت كبيرة عن أبويا لأنه كان بيخدم ناس كتير بحُكم شغلانته، ولما كنت بقول لأبويا يعمل زيه كان دايمًا بيقولي إن اللي بيعمله عمي حرام وإنه مش هيدخل علينا قرش حرام، لحد ما وصل الحال إن ابن عمي خطب وهيتجوز وشقته بقت مفروشة بالكامل وأنا مش عارف أبني شقة فوق بيت أبويا لأننا مُعدمين. . بنت عمي الصغيرة بقت تعاير أختي بلبسها المتقطع وبقت بتقرف تلعب معاها كمان، غير مرات عمي اللي بقت كل شوية تطبخ وتبعت أكل لأمي وفي عنيها نظرة شماتة واستهزاء بينا، ولما كنا بناكل كان أبويا مبيمدش إيده على الأكل، ولما أمي تتخانق معاه يسيبها ويمشي على شغله. . عشان كدا كان فيه قرار عمال يكبر جوايا، قرار إني أروح اترمي بين إيدين عمي وأسيب أبويا خالص، يا إما هكتب على نفسي أعيش عيشة الفقر اللي هو عايشها، وأنا استحالة استسلم للفقر ده أو أسيبه يتمكن مني، أنا عايز أعيش، واتجوز، وأخلف عيال يعرفوا يعيشوا. . ومسافة ما أبويا طلع على شغله روحت واخدها مشي من قلب الغيطان لحد المقابر بتاعة البلد اللي جنبنا، همشي مسافة نص ساعة بس مفيش مشكلة، أنا بحب ظلمة الغيطان والهدوء اللي بتكون غرقانة فيه، بعرف أصفي دماغي وقتها، وأفكر للمصلحة، للمصلحة وبس زي ما بيقولوا. . وبعد نصف ساعة من التوهان كنت على مدخل المقابر، ومسافة ما خطيت عند أول مقبرة سمعت صوته الخشن، القاسي، صوته الواثق وبزيادة بيقول: ـ مين اللي جاي؟! ـ أنا ممدوح ابن أخوك يا عمي.. ـ يا مرحب بالغالي نورت الدنيا.. سلمت على عمي وخدته بالحضن رغم إن بيته لازق في بيتنا، وكالعادة شميت ريحة العِطر واحتواني في الجلبية الفخمة، الراجل ده باين عليه العِز أوي، عكس أبويا اللي مش لاقي حرفيًا.. وبعد قعدة لطيفة من الشاي والدخان بدأت أبوح له بكل حاجة، وهو كان خبيث، تشوف في عنيه كل شياطين الدنيا، وبدون لف ولا دوران قال: ـ أبوك عايش في زمن الأنبياء وفاكر إنه هيغير الكون، ميعرفش إنها بتتعاش مرة واحدة. . ـ عشان كدا جتلك يا عمي، شغلني معاك وأنا هبقا خدام تحت إيدك.. ـ يعني مش هتقولي حلال وحرام؟؟ ـ ولا كأني أعرف حاجة، أنا عجينة شكلها بمزاجك.. ـ طيب كمل الشاي عشان شوية وهنقوم نشتغل، ويوميتك انهاردة ألف جنيه.. جسمي كله اترعش من الكلمة، ألف جنيه دي تقريبًا مرتب أبويا طول الشهر، وبدون مقدمات بدأ عمي يحكيلي إنه ياما نصح أبويا يمشي حاله بس كان بيعترض، حكالي إن فيه طلبة راحوله أكتر من مرة عشان يطلع لهم جثة يدرسوا عليها بمبلغ كبير بس رفض، مع إن ده حرام في إيه مانت بتنفع العِلم وكدا كدا الجثة هياكلها الدود، كلامه رغم إنه مكنش صحيح بس كان عندي استعداد أقتنع بيه تمامًا. . شوية وجه راجل ضخم متلثم وشكله غريب أوي، بص ناحيتي بصة شرسة بس عمي عرفه بيا وكان مُبتسم، عمي خد منه كيس صغير والراجل مشي بدون ولا كلمة، بصيت لعمي باستغراب لقيته ابتسم أكتر وقال: ـ يالا بينا.. ودخلنا أنا وهو في قلب المقابر، ومعرفش ليه حسيت بالخوف رغم إني كنت بسهر مع أبويا في مقابر بلدنا كتير، بس المقابر هنا ليها رهبة، ومنظرها خلى قلبي يتخنق مكانه وأنفاسي تضيق، شوية ووصلنا لمقبرة من المقابر، عمي خرج سلسلة مفاتيح عملاقة ولقيته بيفتح الباب. . بصتله بخوف وسألته: ـ أنت بتعمل إيه؟! بصلي بصة شرسة وقال: ـ أنت مش قولت عجينة بين إيديا، متكترش في الكلام بقا.. واتفتح الباب، ونزل عمي بالكشاف للمقبرة وطلب مني أنزل معاه، ولقيته بيقرب من الجثة وطلع من جيبه خنجر صغير وبكل سلاسة فتح كتف الجثة وحشر فيه لفافة قماش صغيرة لحد ما خفاها في المنطقة المفتوحة، وراح رابط الجرح كويس ولف عليه حتة قماش وخرجنا، كنت بترعش وفاقد السيطرة على جسمي، لقيته راح مطلع ألف جنيه واداهملي وطلب مني أروح. . خدت الفلوس وأنا مرعوب ورجعت على البيت وفضلت لتاني يوم مبنطقش، وتاني يوم بالليل لقيته بيتصل بيا وبيقول: ـ هنكمل شغل ولا هتقدم استقالة؟؟ ورغم رعبي من أفعاله روحتله، وعرفت إن دي أسحار بتجيله من أكتر من ساحر، ولما بتتزرع في جسم الجثة وتدفن بيبقا تأثيرها رهيب على المسحور، وكمان بيبقا صعب تتلاقى وتتفك، وكل سحر بيحطه جوة جثة بيكون مقابل تلت آلاف جنيه، وكل ليلة كان ممكن يدفن عمل واتنين وتلاتة، الراجل ده عمل ثروة ضخمة من الموضوع ده، ثروة عظيمة. . ويوم بعد يوم اعتزلت أبويا وأوهمتهم إني أشتغلت في شركة أمن فترة مسائية، وبقيت زي الظل لعمي، معاه ٢٤ ساعة، بعمل فلوس مكنتش أحلم بيها في حياتي كلها، فلوس كتير، وبقيت بتحكم في أعصابي أكتر وأكتر، لحد ما قعدنا في مرة وكان عمال يعطس بطريقة غريبة، كان تعبان أوي وقعد في الأوضة الصغيرة مش قادر يتحرك، شوية وجه الراجل المُلثم، ادانا عملين ومشي ومعاهم ٦ آلاف جنيه. . عمي مكانش قادر يقوم من مكانه، وطلب مني أروح أنا أحطهم جوة جثة هيوصفلي قبرها، ولما اعترضت غضب، وقال إنه لو مش هيعتمد عليا يبقا أمشي وماجيش تاني، وسكت غصب عني، طمني وقالي إنه هيوصفلي قبر ويديني مفتاحه الميت اللي فيه مدفون انهاردة وجاي في حـ,ـادثة وجسمه متقطع أصلًا، يعني المهمة هتكون سهلة خالص. . وكمان وعدني لو عملت كدا هاخد انهاردة أربع آلاف مش ألفين، ومفيش مشكلة لو حطيت العملين في نفس الجُثة، خدتهم وأنا عمال أطمن نفسي إن الموضوع هيعدي ومفيش أي مشكلة هتحصل، وفعلًا روحت للقبر الموصوف وفتحت الباب، وقابلت ظُلمة ما بعدها ظُلمة، كل مرة كان عمي بيبقا معايا، أما المرة دي أنا لوحدي، والظلام شديد. . نورت كشاف الموبايل ونزلت القبر وكانت الجثة قدام مني، وكأنها حية وبتتنفس، متكفنة بالكفن الأبيض، قربت منها وأنا ريقي ناشف زي الحجر، كشفت عن وشها وجسمي كله أترج، الجثة كانت متدمرة، وكأن فيه عربية نقل معدية عليها، جثة مهروسة، والجسم كله متقطع، يعني هحط العمل اللي عبارة عن قماشة مبرومة في أي جرح، وهربط بحبل صغير عشان أقفل على اللحم، و. .. وطفى نور الفلاش تمامًا، مسكت الموبايل وحاولت أفتحه بس مكانش بيفتح، أجرب البصمة متفتحش، أكتب الباسوورد يقولي خطأ، جربت مرة واتنين لحد ما فتح، نورت الفلاش و... فين الجثة؟! نورت يمين وشمال لقتها واقفة في زاوية القبر ومفتحة عنيها، وكانت بتزوم زي الحيوان بالظبط، وحسيت وقتها إني اتضـ,ـربت بخنجر بارد في صدري اتسبب في شلل تام، برودة مسكت جسمي وصدري بدأ يضيق ويضيق وكأنها سكرات المـ,ـوت هجمت عليا في لحظة واحدة، حاولت اتنفس مقدرتش، وكأن فيه حاجة زي الجبل فوق صدري مانعاني إني أخد شهيق واحد. . كل ده بيحصل في لحظات بس، حتى المكان بيضلم وبحس بحاجة بتسحبني في حُفرة عميقة أوي، وقدام عنيا شوفت الجثة بتحط صباعها في عنيا، ووقعت من طولي، وقعت وحاولت أزحف، أهرب من المـ,ـوت اللي بقا وشيك جدًا، وزي ما بدأت كل حاجة انتهت في لحظة، ولقيت الجثة نايمة قدامي ومفيش أي حاجة، شهقت مرة واتنين واتنفضت من مكاني وقفلت الباب وخرجت، أنا مش هعمل ده لو همـ,ـوت. . روحت على عمي وأنا فاقد السيطرة على جسمي وقبل ما أوصل رن تليفوني، لقيته أبويا اللي بيتصل، دموعي نزلت أول ما قرأت اسمه ورديت عليه، وسمعت صوت صراخ رهيب، ولقيته بيقول: ـ أنت فين يا بني، فيه ناس هجموا على بيت عمك وولعوا فيه ولحقنا مرات عمك وولادها بالعافية، متظهرش دلوقتي لحد ما نفهم فيه إيه. . وقبل ما أنطق بنص كلمة شوفت رجالة جايين من مدخل المقابر، ماسكين سـ,ـلاح وعصيان، استخبيت قبل ما يشوفوني بلحظة، ووقفت أراقبهم بفزع، وكسروا باب الأوضة ودخلوا على عمي، وسمعت الصرخات، صرخات واحد بيتقطع حرفيًا بالسـ,ـلاح والشوم، وفي لحظة رموا البنزين وولعوا في الأوضة بعمي، وسمعت صوته وهو بيتفحم في الأوضة من جوة، وكأنه بيتحرق في قلب جهنم. . وهربت، هربت ورجعت على البيت ولقيت البلد مقلوبة حرفيًا، أهل البلد اللي جنبنا وصلهم أكتر من خبر إن عمي بيقطع في جثث أهاليهم، ولما اتأكدوا من ده شوية هجموا وحرقوا بيته ولولا حمية أهل بلدنا كانت مراته وولاده اتحرقوا، وشوية قـ,ـتلوه هنا في المقابر، وسبحان الله محدش عرف إطلاقًا إن أنا بساعده ومعاه، وإلا كان بيتنا اتحرق واتقتـ,ـلت أنا كمان، يمكن اللي نجانا إن أبويا رفض الحرام فربنا نجانا بأفعاله. . وفضلت الدنيا مقلوبة أسبوع كامل، تحقيقات وشرطة ومواضيع كبيرة، لحد ما في النهاية شوفت الحقيقة المُخيفة، في يوم وليلة بيت عمي اتحرق، بنته اللي بتفتخر بلبسها كله اتحرق، مراته اللي بتفتخر بالأكل والشرب كله اتحرق، ابنه اللي فرش شقته وخلاص كان هيتجوز شقته اتحرقت. . وعمي اللي كان بيصرف على البيت اتحرق، وكأن نار الفلوس الحرام قررت تاخد كل حاجة في سكتها، وفي لحظة كل حاجة بقت هباء منثور، نظرات عين أبويا بعد الحـ,ـادثة كانت أبلغ من مليون كلمة، نظرات بتقول: ـ شوفت يابني، شوفت إننا ممكن نصبر على الفقر بس استحالة نقدر نصبر على نار المال الحرام، شوفت يابني أخرتها كانت إيه، عرفت يابني إني عشان كدا مدخلتش عليكم قرش حرام في حياتي، اتعلمت يابني ولا لا. . ـ يا أبتِ اتق الله فينا ولا تطعمنا إلا من حلال، وإياك أن تدخل علينا الحرام، فإننا نصبر على نار الجوع، ولا نصبر على نار جهنم .. بقلم/ أحمد محمود شرقاوي

مقالات ذات صلة

انا مرتبطة بواحد بحبه

فى قصر عائله السيوفى

حكايات محمد عبده

مواقف في حياة الشيخ الشعراوي ..

انا هحكي مشـ,ـكـ,ـلتي علشان حرفيا تعبت

بعت دهبي

اترك تعليقاً إلغاء الرد