من غير ما يعرف

دخلت مريم عربيتها القديمة، قفلت الباب وقعدت ورا الدريكسيون وجسمها كله بيترعش، مش من الخوف، ده كان زلزال غضب مكتوم بقاله سنين وانفجر. صوت جلال الألفي المحامي لسه بيرن في ودنها كأنه آلة حرب بتستعد للشغل. حطت المظروف على الكرسي اللي جنبها، دورت العربية وطلعت من جراج مستشفى "الشفاء" والمطر بيخبط في الزجاج زي طلقات رصاص صغيرة. كانت شايفة في المراية مبنى المستشفى اللي نوره مالك المكان، المبنى اللي شافت فيه المرار مع شريف وأمه، واللي افتكروه تكية ورثوها عن أهاليهم. على الناحية التانية، في الدور الأخير، مكتب المدير الإداري كان ريحته مقلوبة بسيجار شريف الغالي وضحكات نيرمين الرقيعة. شريف كان قاعد ومادد رجله على المكتب، والراحة مالية وشه كأنه انزاح من على قلبه جبل. الحجة توحيدة كانت قاعدة على الكنبة الجلد وبتسبح بحمد ربنا وهي بتقول: "أهو كده الواحد يعرف يتنفس في المكان! البت دي كانت عامله زي العزول، شفتات بالليل والنهار ومقضياها غلب ومسهوكة، والكل كان بيحلف بحياتها ويقولوا مريم مريم، أهو غارت في داهية." نيرمين قربت من شريف ودلعت صوتها وهي بتقدم له كاس عصير: "أنا مكنتش عارفاك حامش كده يا شريف! بس بجد برافو، المستشفى دي واجهة، ومينفعش مرات المدير تبقى ممرضة بياكلوا وشها في الرايحة والجاية، إحنا محتاجين نطور، ومجلس الإدارة الأسبوع الجاي لازم يشوف وشوش تليق بالمرحلة الجديدة." شريف نفخ دخان السيجار لفوق وهو بيضحك بغرور: "مجلس الإدارة في جيبي يا نيرمين. العقد الجديد بتاع توريد الأجهزة الطبية اللي هنعمله مع الشركة الألمانية هيخلينا فوق، والكل هيبصم بالعشرة. ومريم؟ مريم خلاص، صفحة واتفلت، تروح بقى تقعد في البيت تربي فريدة، وتاخدلها قرشين نفقة يمشوها." مفتكروش للحظة إن مريم وهي سايقة في الشوارع المغرقاها المطر، كانت رايحة لمكان ميروحوش إلا اللي بايعين القض*ية. وصلت قدام عمارة قديمة في وسط البلد، من العمارات اللي ليها هيبة، جدرانها عالية وأسانسيرها بقفص حديد قديم. طلعت الدور الرابع، ووقفت قدام يافطة نحاس عريضة مكتوب عليها بخط رقاع دقيق: "جلال الألفي – المحامي بالنقض". خبطت خبطتين، الباب اتفتح بسرعة كأن الراجل كان واقف وراه مستنيها. جلال الألفي كان راجل عدى الستين، شعره أبيض كله بس واقف مظبوط، عينيه حادة زي الصقر، ولابس بدلة كاملة كأنه لسه خارج من قاعة المحكمة حالا. بصلها بنظرة فيها حزن وفي نفس الوقت فيها لمعة انتصار: "اتفضلي يا دكتورة مريم.. اتفضلي يا بنتي. أخيراً." مريم دخلت، قعدت على كرسي خشب زان قديم، وحطت المظروف على مكتبه: "أنا جيت يا أستاذ جلال. شريف طردني النهاردة قدام المستشفى كلها، نتش كارنيهي و رماني بره." جلال الألفي ابتسم ابتسامة باردة، قعد ورا مكتبه، وفتح درج سري بمفتاح صغير، وطلع منه ملف تخين جداً مربوط بشريط أسود: "شريف علام فكر إن الدنيا سايبة، وفكر إن سكوت أبوكي الله يرحمه الدكتور رأفت كان ضعف. الدكتور رأفت مكنش ضعيف يا مريم، بس كان عارف إنك بتحبي شريف، وكان خايف يكسر قلبك، فقاللي: سيبها تعيش حياتها يا جلال، لو شريف صانها وصان الأمانة، المستشفى تفضل ماشية والربح يجيلهم لحد عندهم، لكن لو غدر بيها.. الملف ده يتفتح." مريم سألت بوجع: "الملف ده فيه إيه يا أستاذ جلال؟ أنا طول عمري عارفة إن بابا كان شريك مع أبو شريف الله يرحمه بالنص." جلال الألفي سحب النظارة ولبسها، وفتح الملف وبدأ يقرا وعينيه بتلمع: "النص؟ لا يا بنتي. شريف وأبوه كانوا دايماً واجهة وإدارة بس. مستشفى الشفاء دي، بأرضها، بمبانيها، برخصتها التجارية، مملوكة بنسبة 80% للدكتور رأفت الشافعي. يعني شريف وأمه وكل عيلتهم مملكوش فيها غير 20%، والـ 20% دول مشروطين بإدارتهم الناجحة، وفي بند في عقد التأسيس بيقول: يحق للمالك الأكبر عزل المدير الإداري وتعيين مجلس إدارة جديد فوراً وبدون إبداء أسباب، في حال إساءة استخدام السلطة أو الإضرار بسمعة المستشفى." مريم لفت راسها من الصدمة: "يعني أنا.. أنا بملك المستشفى دي كلها؟" المحامي خبط بإيده على المكتب: "انتي مش بس بتملكيها، انتي من اللحظة دي رئيسة مجلس الإدارة الفعلي. ومش بس كده، الدكتور رأفت قبل ما يموت، سابلي تفويض رسمي موثق في الشهر العقاري، وبأثر رجعي، بيديكي الحق في مراجعة كل الحسابات القديمة. وأنا بقالي ست سنين، من غير ما شريف يحس، وبمساعدة ناس مخلصين جوه الحسابات، بجمع أدلة. شريف بيسرق المستشفى يا مريم. شريف بياخد عمولات من شركات الأدوية، ومزور فواتير الأجهزة الطبية اللي دخلت الرعاية المركزة السنة اللي فاتت، والفلوس دي كلها بتتحول لحساب شخصي باسمه وباسم أمه." مريم قامت وقفت، دموعها نشفت تماماً، وحست بدم جديد بيجري في عروقها: "يعني هما عايشين في خيري، وطردوني من حلالي؟" جلال الألفي قلع النظارة وقام وقف قدامها: "دلوقتي القرار ليكي. نرفع قض*ية ونمشي رسمي وناخدهم على الهادي، ولا عايزة حظك يجي لحد عندك؟" مريم بصت من شباك المكتب على أنوار القاهرة، وقالت بنبرة صوت مسمعتهاش من نفسها قبل كده، نبرة قوية وحاسمة: "لا يا أستاذ جلال. اللي اتعمل فيا وفي كرامتي قدام الدكاترة والممرضات والعيانين، لازم يترد في نفس المكان وبنفس الطريقة. أنا مش عايزة قضايا تقعد في المحاكم بالسنين. أنا عايزة أدخل المستشفى دي وأنا باخد حقي تالت ومتلت، وقدام الكل." المحامي ابتسم وضيق عينيه: "يبقى رتبي نفسك. الأسبوع الجاي، يوم الثلاثاء الساعة 10 الصبح، فيه اجتماع طارئ لمجلس الإدارة عشان يمضوا عقد الأجهزة الألمانية الجديد اللي شريف مراهن عليه. شريف عازم كل الدكاترة الكبار ورؤساء الأقسام والممرضات الأقدم في القاعة الرئيسية عشان يعمل لقطة شو ويوري الكل إنه بيطور المستشفى. ده هيبقى ميعادنا." مرت الأيام الخمسة اللي قبل الاجتماع كأنها دهر. مريم قعدت في بيتها، ومتردش على تليفونات شريف اللي كانت بتيجي بس عشان يرمي عليها كلام تسم بدن، أو يطلب منها توقع على ورق تنازل عن شقتها عشان "التسوية" بتاعة الطلاق. شريف كان فاكر سكوتها ده انكسار، وأمه توحيدة كانت بتروح وتيجي في الفيلا وتقول: "أهي لفت ديلها ونامت في الخط، عرفت حجمها وعرفت إنها من غيرنا ولا تسوى مليم في سوق النسا." يوم الثلاثاء الموعود، الساعة كانت 9:45 الصبح. مستشفى الشفاء كانت مقلوبة، الزينة في كل مكان، والوفد الألماني وصل وقعد في قاعة الاجتماعات الكبرى في الدور الثاني. القاعة كانت مليانة على آخرها؛ الدكاترة الاستشاريين، الممرضات، نيرمين اللي كانت لابسة فستان شيك ومقضياها ضحك وتوزيع نظرات ثقة، وشريف اللي كان لابس بدلة فخمة جداً وساعته بتلمع، وواقف ورا المنصة بيتكلم في المايك وبيرحب بالناس. أمه الحجة توحيدة كانت قاعدة في أول صف كأنها الملكة الأم. شريف بدأ يتكلم بثقة وزهو: "أهلاً بيكم جميعاً في يوم تاريخي لمستشفى الشفاء. النهارده إحنا بنمضي عقد نقلة نوعية، عقد هيخلينا في مصاف المستشفيات العالمية. الإدارة الحديثة مش مجرد كلام، الإدارة أفعال وتطوير وتخلص من العقول القديمة اللي كانت بتعطلنا." وغمز لنيرمين اللي ضحكت بخبث. في نفس اللحظة، باب القاعة الرئيسي الكبير اتفتح بعنف. الصوت خلى شريف يسكت والكل يلتفت وراهم. دخلت مريم. بس مكنتش مريم الممرضة اللي ببالطو متبهدل وشعر ملموم. كانت مريم تانية خالص. لابسة بدلة كلاسيك سوداء شيك جداً، هيلز عالي صوته بيضرب في الأرض زي دقات الساعة، شعرها معمول باستايل راقي، وعلى وشها نظارات شمس سوداء قلعتها أول ما دخلت وعلقتها في جيب الجاكيت. وراها كان ماشي جلال الألفي وبإيده شنطة جلد سوداء تقيلة، ومعاهم اتنين رجالة بهيبة واضحة، باين عليهم إنهم مستشارين وقانونيين. القاعة كلها برطمت. الممرضات همسوا لبعض: "دي مريم؟ مش ممكن! شكلها قالب على هانم من هوانم الزمالك!" شريف وشه اتخطف للحظة، بس استجمع ثقته وزعق في المايك: "انتي إيه اللي جابك هنا يا مريم؟ أنا مش طردتك؟ الأمن! فين الأمن يجي يرمي الست دي بره؟!" الحجة توحيدة وقفت وزعقت بصوت سوقي وسط القاعة: "انتي جاية تعمليلنا فضيحة هنا يا مقصوفة الرقبة؟ بره! المستشفى دي مبقاش ليكي عيش فيها!" نيرمين ضحكت بصوت مسموع: "مسكينة.. جاية تدور على شغل في يوم زي ده؟" مريم متهزتش ولا خطوة، فضلت ماشية بثقة لحد ما وصلت للممر الرئيسي بين الكراسي، وقفت وبصت لشريف وابتسمت ابتسامة هادية جداً. جلال الألفي مشي خطوتين لقدام، طلع وثيقة رسمية مختومة بالنسر وبأختام حمراء كتير، ورفعها لفوق وقال بصوت جهوري هز القاعة: "يا أستاذ شريف علام، الزم حدودك. الست اللي واقفة قدامك دي مش جاية تدور على شغل، ولا جاية تعمل فضيحة. الست دي هي الدكتورة مريم رأفت الشافعي، المالك الفعلي والوحيد لـ 80% من أسهم مستشفى الشفاء، ورئيسة مجلس الإدارة الجديدة بناءً على الوصية الرسمية الموثقة وعقد التأسيس!" السكوت حل على القاعة كأن ملك الموت دخل. الوفد الألماني بدأ يتلفت ويسأل المترجم في إيه. شريف وشه قلب ألوان، وبدأ يقطع في الكلام: "أنت.. أنت بتقول إيه يا راجل يا خرفان أنت؟ وصية إيه وأسهم إيه؟ المستشفى دي بتاعة أبويا!" مريم قربت من المنصة، سحبت المايك من إيد شريف بكل برود، وبصت للجمهور كله، للدكاترة وللممرضات اللي طردها قدامهم. وقالت في المايك وصوتها واثق وراسي: "مستشفى الشفاء طول عمرها ملك لأبويا، الدكتور رأفت. وأنا اللي كنت سايباكم تلعبوا وتعيشوا الوهم عشان كنت فاكرة إن شريف بيصون البيت. بس من اللحظة دي، اللعب انتهى." التفتت لشريف اللي كان بيعرق بغزارة وبدأت ايديه تترعش: "شريف علام.. أنت من اللحظة دي مقال من منصبك كمدير إداري، وممنوع من دخول المستشفى دي نهائياً." الحجة توحيدة جريت عليها وهي بتصرخ: "انتي هتخرفي يا بت؟ مستشفى إيه اللي تملكيها؟ إحنا هنوديكي في داهية!" جلال الألفي اتدخل وطلع ملف تاني من شنطته وحدفه على التربيزة قدام الوفد الألماني وقدام الدكاترة الكبار: "والكلام مش بس إقالة. دي ملفات الفساد والاختلاس وتزوير الفواتير اللي شريف علام وأمه كانوا بيعملوها بقالهم سنين. بلاغ رسمي اتقدم للنائب العام الصبح، وبقوة القانون، الحسابات الشخصية لشريف وتوحيدة علام اتجمدت من نص ساعة تجميد تحفظي لحين انتهاء التحقيقات!" شريف رجع لورا خطوتين وهو مش مصدق، سقف طموحاته كله انهار في ثانية. نيرمين أول ما سمعت كلمة "تجميد حسابات" و"نيابة"، رجعت لورا براحة، وسحبت شنطتها من على الكرسي واستحبت وسط الزحمة وخرجت من الباب الخلفي للقاعة من غير ما تنطق بكلمة، بايعة شريف في أقل من لحظة. مريم بصت لشريف وأمه اللي كانوا واقفين زي الفراخ المبلولة وسط الدكاترة والممرضات اللي كانوا من كام يوم بيطبلولهم، ودلوقتي الكل بيبص ليهم بقرف وشماتة. مريم قربت من شريف، وطت عليه وقالتله بنبرة واضحة سمعها الكل: "فاكر لما قولتلي اخلصي عيطي بسرعة عشان وراكي عيانين؟ أنا مش هعيط يا شريف. بس أنت وأمك قدامكم مشاوير كتير في النيابة.. اخلصوا وراكم تحقيقات." شريف انهار وقعد على الكرسي ومش قادر ينطق، وأمه بدأت تلطم على وشها وتصرخ وسط القاعة والأمن دخل عشان يخرجهم بره المبنى بناءً على أمر رئيسة مجلس الإدارة الجديدة. مريم التفتت للوفد الألماني، وبدأت تتكلم معاهم بلغة ألمانية طليقة أبهرت كل الدكاترة اللي قاعدين، وقالتلهم إن العقود هتتراجع قانونياً لضمان مصلحة المستشفى والعيانين أولاً. القاعة كلها صقفت، الممرضات والدكاترة قاموا وقفوا تعظيماً لمريم اللي رجعت حلالها بذكاء وقوة. بعد ساعتين، كانت المستشفى بدأت تهدى. مريم كانت قاعدة في مكتب المدير الكبير، المكتب اللي كان شريف بيقعد فيه. كانت بتبص على صور أبوها الدكتور رأفت اللي أمرت بتعليقها فوراً في الصالة الرئيسية. الباب خبط، ودخل جلال الألفي ومعاه ممرضة شابة اسمها هدى، اللي كانت واقفة مع مريم في الرعاية المركزة يوم الطرد. هدى كانت بتبص لمريم بإعجاب وخوف: "دكتورة مريم.. قصدي يا فندم.. عم عبده في الرعاية المركزة تعبان جداً، وبيغيب عن الوعي، ومن الصبح عمال ينده باسمك ويقول عايز مريم." مريم قامت فوراً، قلعت جاكيت البدلة الشيك، وطلعت بالطو أبيض جديد تماماً كان جلال الألفي جايبهولها. لبسته، وبصت لنفسها في المراية. مريم مكنتش عايزة تسيب أصلها، هي فخورة إنها ممرضة وبتنقذ أرواح. نزلت للدور الأول، دخلت الرعاية المركزة. المكان كان هادي، الدكاترة والممرضات أول ما شافوها وقفوا انتباه وبصوا لها باحترام شديد. مشيت بخطواتها الواثقة لحد سرير عم عبده. الراجل العجوز كان وشه شاحب، وأجهزة قياس نبضات القلب بتصفر بانتظام بطيء. مريم قعدت جنبه، مسكت إيده المحملة بالخراطيم بحنية وقالت: "أنا هنا يا عم عبده.. مريم معاك." عم عبده فتح عينيه بصعوبة، بص لوشها، وابتسم ابتسامة باهتة كأنه كان مستنيها عشان يطمن. وبصوت مبحوح وضعيف جداً قال: "أنا عارف يا بنتي.. عارف إنك غالية وبنت غالي.. المستشفى نورت بأصحابها." مريم دمعت وهزت راسها: "الله يخليك ليا يا راجل يا طيب، متقلقش أنا مش هسيب المستشفى ولا هسيبكم." في اللحظة دي، جهاز رسم القلب بدأ يضرب صفارات سريعة ومتلاحقة ومجنونة. المؤشرات بدأت تنزل بسرعة غريبة. الدكتور الناب جرى بسرعة: "صدمة قلبية مفاجئة! النبض بيقع يا فندم!" الممرضات جروا وجابوا جهاز الصدمات الكهربائية. مريم وقفت بسرعة، وبدأت تدير العملية بنفسها بخبرتها الطويلة: "شحن على 200! بسرعة!" كلهم كانوا شغالين تحت إيد مريم اللي بتنقذ حياة الراجل اللي دافع عنها. شحنت الجهاز وحطته على صدر عم عبده: "ابعدوا.. صدمة!" جسم الراجل اتنفض، بس المؤشر لسه بينزل. "اشحن على 300! بسرعة يا هدى!" مريم كانت بتعرق وبتجاهد بكل قوتها عشان متخسرش أول حالة بعد رجوعها. وفي وسط المحاولات المستميتة دي وصوت الأجهزة اللي بيملى المكان بالتوتر، دخل ممرض تاني وهو بيجري ووشه أصفر ك الليمونة، وبص لمريم برعب وقال بصوت مخنوق: "دكتورة مريم! الحقيرنا! فيه عربية إسعاف لسه واصلة حالا الطوارئ.. ومعاها حالة حرجة جداً بين الحياة والموت بعد ما عمل حادثة عربية شنيعة على الطريق الدائري وهو هربان!" مريم وهي بتضغط على صدر عم عبده سألته من غير ما تلتفت: "مين الحالة؟!" الممرض بلع ريقه وبص في الأرض وهو بيترعش: "شريف علام يا فندم.. شريف جوزك، العربية اتقلبت بيه وهو سايق زي المجنون، ودلوقتي بينزف بنزيف داخلي في المخ ومفيش ولا دكتور جراحة جوه الطوارئ قادر يتعامل مع الحالة.. وهو بيموت بره!" مريم إيدها وقفت للحظة فوق صدر عم عبده. الأجهزة من ناحية بتصفر لعم عبده اللي بيموت، وشريف اللي دمر حياتها وطردها بيموت على الناحية التانية في الطوارئ ومصير حياته بإيدها هي بس. بصت للممرض، وبصت لعم عبده، والكل في الرعاية وقف ومبقاش حد بيتنفس، مستنيين قرار رئيسة المستشفى اللي في إيدها تحيي أو تموت اللي كسرها.

مقالات ذات صلة

حمايا كان ١

معلش يا ادهم

امرأة الودع كاملة

بعد موت امى

ما الذي يحدث لجسمك لو توقفت عن تناول السكر 30 يوما

يوسف بقولك

اترك تعليقاً إلغاء الرد