جالنا عريس
ردت عليا ببرود يق.تل: “الجواز مش حب ومحن يا بنتي، الجواز ستر واستقرار، والعريس ده هيخليكي هانم وكل طلباتك مجابة.. فكري في مصلحة أهلك، إحنا محتاجين السند ده، وده الحل الوحيد”. روحى ظبطى وشك كده واخرجيلنا . مسحت دموعي بضهر إيدي وقمت وقفت وأنا بلملم شتات نفسي.. مكنش ينفع أفضل محبوسة في الأوضة والبيع والشرا شغال عليا بره وكأني حتة جماد ملوش رأي. أول ما فتحت الباب، جالي صوته من الصالة، كان عالي وحاد، ملوش علاقة خالص بضعف جسمه ولا بالكرسي اللي هو قاعد عليه.
كان بيقول لآخره وهو بيبص لبابا وعمي: “أنا مش فاهم أنتم بتعملوا إيه؟! أنا جيت هنا وشاورت على أختها.. أنا مش عايز عفاف، ولا هي دي اللي دخلت دماغي! أنتم فاكرين عشان قاعد على كرسي هتمشوا كلامكم عليا وتجوزوني بمزاجكم؟!”. وقفت في طرقة البيت، جسمي كله بيترعش من الإهانة.. كمل هو بلهجة فيها سمّ وهو بيبص ناحية أوضتي: “وبعدين العروسة اللي أنتم بتقدموهالي دي.. لا شكل ولا قبول، واحدة باين عليها الهمّ والفقر من قبل ما تنطق.. أنا لو كنت عايز ممرضة كنت أجرتها بفلوسي، لكن أنا جاي أتجوز ست تملى العين وتليق بمقامي ومقام عيلتي.. مش دي!”.
الكلمات نزلت عليا زي السكاكين، كنت شايفة نظرات أهلي اللي بقوا زي “العرايس الماريونيت” قدام فلوسه، وبابا اللي كان لسه من شوية بيقنع أمي بيا، بقى واقف مش عارف ينطق، وعينه في الأرض من ك.سرة النفس قدام جباروته رجعت خطوات لورا وأنا حاسة إن الدنيا كلها بتلف بيا، الكلمات كانت أتقل من إن عقلي يستوعبها.. الكبرياء اللي جوايا اتردم عليه في لحظة واحدة، مش بس من أمي اللي كانت مستعدة تبيعني للّي يدفع، لكن من الراجل اللي فاكر إن فلوسه تديله الحق يهين كرامتي بالشكل ده قدام أهلي وفي بيتنا.
بصيت لبابا لقيته موطي راسه أكتر، كأنه بيتمنى الأرض تنشق وتبلعه، وأمي اللي كانت من ثواني بتجبرني وأنا بعيط، كانت واقفة بتفرك في إيديها بقلة حيلة والابتسامة المزيفة مرسومة على وشها بضعف وهي بتحاول تلطف الجو وتقول بصوت مرتعش: “يا بيه يا فندم افهمنا بس.. عفاف عاقلة وست بيت ومربينها على الغالي، وأختها دي لسه صغيرة ومش وش مسؤلية.. أنتم بس ادوا لنفسكم فرصة وهتشوفوا إنها…”.
قاطعها بصوت زلزل الصالة كلها وهو بيضـ,ـرب بقوة على ذراع الكرسي المتحرك: “بس! مش عايز أسمع كلمة زيادة! أنتم فاكريني هبل؟ فاكرين عشان أنا ظروفي كدة هتقبلوا بأي بيعة وتدوهالي وتتحكموا فيا؟ أنا جيت بنفسي وطلبت البنت الصغار، هي دي اللي عجباني وهي دي اللي هتجوزها، مش عاجبكم والشروط مش جاية على هواكم، قفلوا الصفحة دي فوراً”.
