اخطر معلم مافيا ١

وقفت عند باب جانبي. وبعدها ظهر راجل لابس بالطو أبيض. وشه مش واضح. لكن إيده كانت باينة. وفي صباعه خاتم فضة. عليه علامة عقرب. أنا شهقت.”ده هو!”
سليم بصلي.”متأكدة؟”
“أيوه… نفس الخاتم اللي شفته في المستشفى.”
سليم وقف فجأة.”إنتِ شوفتي الراجل ده قبل كده؟”
أنا هزيت راسي.”مش عارفة وشه. بس الخاتم.

.. أيوه.”
سليم ضغط على الشاشة، ووقف الفيديو عند لقطة إيد الراجل. وبعدين قال:
“ده مش موظف في القصر.”
“يبقى دخل إزاي؟”
“لسه هنعرف.”
في اللحظة دي، موبايله رن. رد بسرعة.”اتكلم.”
سمعنا صوت الحارس من الناحية التانية:
“يا معلم، لقينا حاجة في أوضة نادية.”
سليم سأل:
“إيه؟”
“علبة أدوية، وموبايل قديم. وفي رسالة متسجلة على الجهاز.”
سليم بصلي.”شغّلها.”
صوت تسجيل طلع من الموبايل، ضعيف ومشوش. وبعدين صوت نادية ظهر:

“أنا مش هقدر أكمل. الطفل مش ذنبه حاجة. وإنتو وعدتوني إن مفيش أذى هيحصله.”
صوت راجل رد عليها:
“إنتِ أخدتي فلوسك. كملي شغلك.”
نادية بدأت تعيط.”بس هو بيموت!”
الراجل رد ببرود:
“لو اتكلمتي، ابنك مش هيشوفك تاني.”
التسجيل انتهى. أنا حطيت إيدي على بقي.”يا نهار أسود…”
سليم كان واقف من غير ما يتحرك. لكن قبضته كانت مقفولة بشدة.”نادية عندها ابن؟”
الحارس رد:
“أيوه يا معلم. لقينا بياناته في ملفها.”
سليم قال:
“هاتولي كل حاجة عنها. ومحدش يقرب من ابنها قبل ما نعرف مكانه.

”
قفل المكالمة. أنا بصيت له.”يعني نادية كانت مجبرة؟”
“ممكن.”
“يبقى هي مش اللي كانت بتجوّع آدم؟”
سليم رد بحذر:
“لسه مانعرفش دورها بالكامل.”
سكت شوية، وبعدين قال:
“لكن اللي واضح إن في حد كان بيضغط عليها.”
أنا مسحت دموعي.”لازم نلاقيها.”
سليم بصلي باستغراب.”إنتِ لسه خايفة على واحدة ممكن تكون أذت ابني؟”
هزيت راسي.

“أنا مش عارفة هي عملت إيه. بس لو عندها طفل وحد بيهددها بيه… أنا عارفة يعني إيه حد يستخدم طفل عشان يكسر أمّه.”
سليم فضل ساكت. ولأول مرة، حسيت إنه فهم أنا بتكلم عن إيه. في نفس الوقت، في مكان تاني من القاهرة…نادية كانت قاعدة في أوضة ضلمة، وإيديها مربوطين. قدامها راجل لابس بالطو أبيض. حط موبايل على الترابيزة.

“المعلم سليم عرف.”
نادية بدأت تبكي.”أنا معملتش حاجة! أنا كنت بنفذ اللي طلبتوه مني!”
الراجل قرب منها.”وهو عارف إنك كنتي موجودة ليلة ما الخدامة دخلت الأوضة.”
“أنا مكنتش عايزة أأذي الطفل!”
“يبقى كان لازم تفكري قبل ما تاخدي الفلوس.”
نادية بصت له برعب.”ابني فين؟”
الراجل ابتسم ابتسامة باردة.”لو عايزة تشوفيه تاني، هتعملي آخر حاجة هنطلبها منك.